Wizara ya fedha ya Marekani imekiwekea vikwazo kikundi kimoja cha jeshi la Iran pamoja na mtandao wa biashara unaokifadhili kikundi hicho.
Hii ni sehemu ya kampeni ya Marekani ya kuiwekea Iran shinikizo kubwa la kiuchumi.
Wakati wa kutangaza vikwazo hivyo wizara hiyo ya fedha imekituhumu kikundi hicho kwa kuwapeleka watoto wanajeshi nchini Syria kama uungaji mkono wa serikali ya rais Bashar al-Assad.
Kulingana na wizara hiyo ya Marekani, kikundi hicho kwa jina Basij kilichoundwa muda mfupi baada ya yale mageuzi ya mwaka 1979, ni mojawapo ya vikundi vinavyotumiwa na serikali ya Iran kuweka usalama wa ndani ya nchi na kina matawi katika kila mkoa na mji wa nchi hiyo.
Marekani inasema mbali na raia wa nchi hiyo Iran iliwasajili wahamiaji kutoka Afghanistan na Pakistan katika kikundi hicho kwa lazima jambo lililowafanya baadhi kutorokea Ulaya.
