Rais Dkt. John Pombe Magufuli, leo Januari 3, 2018 ameagana na Gavana wa Benki Kuu ya Tanzania (BoT) anayemaliza muda wake Prof. Benno Ndulu Ikulu Jijini Dar es Salaam.
Baada ya mazungumzo yao, Prof. Ndulu amemshukuru Rais Magufuli kwa kumuamini na kufanya naye kazi tangu alipoingia madarakani na amebainisha kuwa anafurahi kumaliza kipindi chake huku uchumi wa nchi ukiwa mzuri.
Aidha Prof. Ndulu amempongeza Rais Magufuli kwa miongozo muhimu iliyosaidia kuimarisha uchumi ikiwemo kudhibiti mfumuko wa bei ambao mwezi Novemba 2017 ulifikia asilimia 4.4 na kuongezeka kwa akiba ya fedha za kigeni kutoka Dola za Marekani Bilioni 1.8 hadi kufikia Dola za Marekani Bilioni 6 hivi sasa, hali ambayo imeimarisha uwezo wa Serikali kujiendesha na kugharamia miradi mikubwa ya maendeleo.
Aidha Rais Magufuli amezungumza na Gavana Mteule Prof. Florens Luoga na baada ya mazungumzo hayo, Prof. Luoga amemshukuru Rais Magufuli kwa uteuzi huo na kumhakikishia kuwa ataisimamia BoT ili iendelee kuwa chombo imara cha kusimamia uchumi wa nchi, kusimamia fedha ya Tanzania na kuhakikisha nchi inatekeleza miradi mikubwa ya maendeleo kama vile ujenzi wa reli ya kati kwa kiwango cha kisasa (Standard Gauge), ujenzi wa uwanja wa ndege wa kimataifa wa Julius Nyerere Jijini Dar es Salaam.
