Waziri mkuu wa Uingereza Theresa May ataitisha kura nyingine Januari 29 kuhusu makubaliano ya Uingereza kujitoa kutoka Umoja wa Ulaya, kufuatia kushindwa vibaya katika kura ya kwanza mapema wiki hii. Kiongozi wa chama cha Conservative katika baraza la wawakilishi Andrea Leadsom, amesema kura hiyo itafuatia mjadala kuhusu hatua zijazo za serikali kuhusu makubaliano ya Brexit. Leadsom ameliambia bunge kuwa tamko na muswada kuhusu hatua zinazofuata za serikali vitawasilishwa siku ya Jumatatu, na kuongeza kuwa mjadala wa siku nzima kuhusu muswada huo utafuatia Januari 29. Waziri wa mambo ya kigeni wa Ujerumani Heiko Maas hata hivyo amewataka wenye dhamana ya kisiasa nchini Uingereza kuacha maneno na kuwajibika:May alipoteza kura siku ya Jumanne kuhusu makubaliano yake ya Brexit kwa rekodi ya kura 230, baada ya wabunge wa chama chake cha Conservative wanaounga mkono kubakia katika Umoja wa Ulaya na wanaotaka kujiondoa kuungana na wabunge wa vyama vya upinzani kupiga kura dhidi ya mpango huo. Ameahidi kutafuta muafaka bungeni kwa kufanya mikutano na wabunge wa chama chake pamoja na wa upinzani.
