Watoto sita wameuawa na wanne wamejeruhiwa kwa kucharangwa kwa panga na mwanamke aliyejulikana kwa jina la Nana Maganga 35 anayedaiwa kuwa na matatizo ya akili. .
Hata hivyo mwanamke huyo ambaye ni mkazi wa kijiji cha Luzuko kata ya Mizibaziba wilaya ya Nzega Mkoani Tabora, naye aliuawa wakati akidhibitiwa na wananchi.
Aidha imefafanuliwa kuwa kati ya watoto hao sita, watano ni wa kwake mwenyewe na mmoja ni mtoto wa kaka yake.
Kamanda wa Polisi Mkoa wa Tabora Emmanuel Nley akithibitisha kutokea kwa mauaji ya watu hao, amesema kuwa Nana kutokana na tatizo lake la ugonjwa wa akili alikwenda kwa mganga wa jadi ambaye ni shemeji yake kwa lengo la kupatiwa matibabu ndipo mkasa huo wa kuwakata kwa panga watoto wake ambao alikuwa amelala nao katika chumba kimoja ulipotokea.
Kamanda Nley amesema kuwa waliomdhibiti Nana wakati akitekeleza mauaji hayo akiwemo shemeji yake, walidai walimdhibiti kwa kumfunga kamba ambapo baadaye mwenyewe alikunywa sumu na kupoteza maisha.
Amesema jeshi la polisi linawashikilia watu watano akiwepo mume wa Nana na mganga wa jadi kwa tuhuma za kumuua Nana na kuongeza kuwa upelelezi wa tukio hilo unaendelea ili kujua nini chanzo cha mauaji hayo ambayo yamesababisha vifo vya watoto wadogo wasiokuwa na hatia.
Amewataja watoto hao kuwa ni pamoja na Pala Massanja mwenye umri wa miaka 3, Shija Dotto 2, Nyawele Dotto2, Sida Dotto5 , Kulwa Dotto 4 Dotto Dotto, 4 pamoja na Nana.
Aidha amewataja watoto wengine waliojeruhiwa katika tukio hilo kuwa ni Kundi Dotto, Nembwa Dotto, Milembe Massanja pamoja na Mwashi Massanja.
