Shirikisho la soka la Mexico limeanzisha uchunguzi dhidi ya nguli wa zamani wa soka Diego Maradona kuhusu iwapo alikiuka kanuni za kimaadili baada ya kumsifu rais wa Venezuela Nicolas Maduro baada ya mechi iliyochezwa hivi karibuni. Maradona ambaye ni kocha wa timu ya daraja la pili ya Dorados ameibua sintofahamu kufuatia matamshi yake kwenye mkutano na waandishi wa habari baada ya mechi dhidi ya Tampico Madero. Alisema anataka kuitoa mechi hiyo kwa ajili ya rais wa Venezuela Nicolas Maduro na raia wa Venezuela wanaoteseka kufuatia mzozo wa kimamlaka nchini humo. Taarifa ya shirikisho hilo, imesema kamati yake ya nidhamu imeanzisha uchunguzi dhidi ya matamshi hayo kwa madai kuwa yamekiuka vifungu vya 6,7,9,10 na 11 vya kanuni za maadili za shirikisho hilo. Maradona ni mshirika wa karibu wa Maduro na viongozi wengine wa siasa za mrengo wa kushoto wa Amerika Kusini.
