Ikiwa ni sehemu ya juhudi za kuimarisha mahusiano kati ya Tanzania na Jamhuri ya Korea, Mhe. Noel Emmanuel Kaganda, Balozi Mteule wa Jamhuri ya Muungano wa Tanzania katika Jamhuri ya Korea, ametembelea Serikali ya Jimbo linalojitawala la Jeju, ambapo alifanya mazungumzo na Mhe. Park Chong Suk, Balozi wa Mahusiano ya Kimataifa wa jimbo hilo.
Mabalozi hao wamejadili maono ya pamoja ya kuanzisha uhusiano wa kindugu kati ya Zanzibar na Jeju, unaochochewa na ubunifu, maendeleo endelevu, utalii, elimu, biashara, uwekezaji, pamoja na kubadilishana uzoefu na mahusiano kati ya wananchi wa maeneo hayo mawili.
Zanzibar na Jeju, ambavyo ni visiwa vinavyotambulika kimataifa kwa utalii, vina fursa ya kipekee ya kuimarisha ushirikiano kupitia kubadilishana maarifa, mbinu bora na uzoefu wa maendeleo, si katika sekta ya utalii pekee bali pia katika sekta nyingine za uchumi wa buluu kama vile kilimo cha baharini na uvuvi.
Mabalozi hao wawili pia walijadili ushiriki wa Zanzibar katika majukwaa ya kimataifa ya visiwa yanayoandaliwa na Jeju, likiwemo Jukwaa la 22 la Sera za Utalii kwa Visiwa (ITOP Forum) litakalofanyika Oktoba 2026. Ushiriki huo utaendelea kuimarisha ushirikiano miongoni mwa jamii za visiwa na kukuza ustawi wa pamoja.
Mkutano huo ulithibitisha dhamira ya pande zote mbili ya kujenga ushirikiano wa kimkakati unaolenga siku zijazo, unaounganisha Afrika na Asia kupitia urafiki, ubunifu na maendeleo endelevu.
Kutoka fukwe za Zanzibar hadi mandhari ya milima ya volkeno ya Jeju, sura mpya ya ushirikiano wa visiwa inaanza kuandikwa.
