Bunge la Ethiopia limemuidhinisha Sahle-Work Zewde kuwa rais mpya na kuwa mwanamke wa kwanza kushika wadhifa huo. Sahle- Work anachukua wadhifa huo baada ya Mulatu Teshome Wirtu kujiuzulu jana Jumatano. Bi Sahle-Work amehudumu kama balozi wa Ethiopia katika mataifa ya Ufaransa, Senegal na Djibouti na pia katika jumuiya ya ushirikiano wa maendeleo wa nchi za Afrika Mashariki na pembe ya Afrika IGAD. Kabla ya kuteuliwa kuwa rais, alikuwa naibu katibu mkuu wa Umoja wa Mataifa na mwakilishi maalumu wa katibu mkuu wa umoja huo kwa Umoja wa Afrika. Kama rais anatarajiwa kuhudumu mihula miwili ya miaka sita kila mmoja. Hayo yanakuja wiki moja tu baada ya Waziri mkuu wa Ethiopia Abiy Ahmed kuteua asilimia hamsini ya wanawake kuhudumu katika baraza la mawaziri, na kuifanya nchi hiyo kuwa ya tatu barani Afrika baada ya Rwanda na Ushelisheli kuwa na usawa wa kijinsia katika baraza la mawaziri.
